ЕГРН реестрыннан шәхси мәгълүматларны милекчеләр ризалыгыннан башка ачу тыелды
Дәүләт Думасы утырышында Бердәм дәүләт күчемсез милек реестрында (ЕГРН) булган шәхси мәгълүматларны өченче затларга ачу әлеге белешмәләрнең субъекты рөхсәте белән генә башкарыла алуы турында норма кертелде.
Дәүләт Думасының мәгълүмат сәясәте буенча комитет башлыгы Александр Хинштейн ассызыклавы буенча, хәзерге вакытта ике закон бер-берсе белән кисешә: "Персональ мәгълүматлар турында" гы закон нигезендә гражданин әлеге белешмәләр белән үзе генә эш итә ала, ләкин "дәүләт реестры турындагы закон теләсә кайсы зат өчен мәгълүматлар ачык дип белдерә". Хәзер, депутат сүзләренә караганда, "гражданинның әлеге мәгълүматларны ачу һәм теләсә кайсы вакытта аларны ябу мөмкинлеге барлыкка киләчәк".
Әлеге инициатива буенча, ЕГРНда шәхси мәгълүматларны ачканда гражданин берьюлы милекнең элеккеге хуҗалары турындагы барлык белешмәләрне дә ачу күздә тотыла. Бу күчемсез милекнең чисталыгын тикшерү өчен кирәк, шул исәптән ипотека биргән очракта да.
Әгәр күчемсез милек хуҗасы турындагы белешмәләр реестрда ябык булса, андый мәгълүмат кызыксынучы затның язма гаризасы нигезендә, аның хокукларны һәм кызыксынуларын саклау максаты белән эш итүче нотариус соравы буенча гына бирелергә мөмкин. Документ нотариусның әлеге сорау буенча хезмәт күрсәтү бәясен дә билгели – өстәмә эшләрне исәпкә алган очракта да, түләү хакы 450 сумнан артмаска тиеш.
Күчемсез милеккә хокук теркәү турындагы гариза банкларның һәм Росреестрның мәгълүмат каналлары аша бирелергә мөмкин. Гражданин реестрда аның шәхси мәгълүматларын ачу турындагы гаризаны МФЦга да, банкка да барып яза ала.