2025 елдан зиратларның исәпләнгән һәм якынча билгеләнгән санитар-яклау зоналары бетерелә
Татарстан Республикасы Юстиция министрлыгында муниципаль берәмлекләр территориясендә зиратларның санитар-саклау зоналарын билгеләүгә бәйле мәсьәләләр турында фикер алыштылар. Җирле үзидарә органнары хезмәткәрләре белән видеоязманы юстиция министры урынбасары Мөхәррәм Ибәтов үткәрде.
Республикада барлыгы 3806 җирләү объекты исәпләнә, әмма санитар-саклау зоналары проектлары бары тик 27 өчен генә эшләнгән – алар буенча санитар-эпидемиологик нәтиҗәләр һәм санитар-саклау зоналары булдыру турында карарлар бар.
Үзенең функциональ билгеләнеше буенча санитар-яклау зонасы пычрану чыганакларының зарарлы йогынтысыннан халыкның куркынычсызлык дәрәҗәсен тәэмин итә торган яклау барьеры булып тора. Мондый зонаның зурлыгы, күмү мәйданына карап, 50 дән 1000 метрга кадәр үзгәрергә мөмкин.
Нигездә, Татарстанда территориаль планлаштыру һәм шәһәр төзелешен зоналаштыру документларын эшләгәндә ТР Пространство белешмәләре фонды белгечләре зиратларның билгеләнгән, исәпләнгән һәм якынча билгеләнгән санитар-саклау зоналары турында белешмәләрне куллана (санитар-саклау зоналары билгеләү турындагы карарлар, санитар-эпидемиологик нәтиҗәләр, шулай ук СанПиН таләпләре нигезендә). Бу авыл зиратларына да, шәһәрләрдәге мемориаль комплексларга да кагыла. Әлеге зонада җир кишәрлекләреннән торак төзелеше, мәгариф һәм медицина билгеләнешендәге объектлар, ачык типтагы спорт корылмалары, балалар ялы һәм аларны савыктыру оешмалары, рекреацион билгеләнештәге зоналар, бакчачылык алып бару һ.б. максатларында файдалану рөхсәт ителми (РФ Хөкүмәтенең 03.03.2018 №222 карары нигезендә).
Шәһәр төзелеше өлкәсендәге федераль законнар нигезендә 2025 елның 1 гыйнварыннан якынча билгеләнгән, исәпләнгән (башлангыч) санитар-саклау зоналары яшәүдән туктый, ә аларда җир кишәрлекләреннән файдалануны чикләүләр гамәлдән чыгарыла.